سل عن عـدوّي ولا تسـأل عـن احبابـي
ما تعرف الرجـل حتـى تعـرف اعـداءه !!
لولا ( الردى ) ما عرفت ( الطيب ) باصحابي
و ( العلم ) لولا ( الجهل ) ما شاعت اصداءه
يا ناشـد عيـون خلـق الله عـن شهابـي
لوما السماء مظلمـه .. مـا بانـت اضـواءه
وانا مع النـاس .. لا اجامـل ، ولا احابـي
ولانـي مـن اللـي بحكمـه يتبـع اهـواءه
بعثـرت كـل القيـم فـي فهـرس كتـابـي
شاعر : يرتّـب زمـن .. لا بعثـر آراءه !!
بحضور صدقـي .. قـدرت اكـذّب غيابـي
يا سيّدي .. والمطـر يلغـي العطـش مـاءه
يا عم .. فض العتب .. مـا ينفـع عتابـي
ماني اللي لا استبحت الذنـب واغـراءه
كيـف اتسـوّل بشعـري واطعـم انيـابـي
هو فيه رجل ٍ يجوع .. و ياكـل اشـلاءه !!
لـو زرت جـدران ذاكـرتـي ومحـرابـي
والضيـق لا حاصـر انفـاسـي بخـيـلاءه
ولـو سولـف الدفتـر الغافـي بـدولابـي
عن طفل يا ما انحـرم مـن أجمـل أشيـاءه
ولو سولف الشعر لك عن حرقـة اعصابـي
لا سافرت بـي طقوسـه .. لآخـر اجـواءه
مـا لمتنـي يـوم اشـرّع لاجلـه ابوابـي
واصْدق معه .. واصْدقَه .. واصدّق ايحـاءه
تيّممـي يـا هـمـوم الـنـاس بتـرابـي
كـل ٍ بشعـري لقـى كفّـارة اخـطـاءه !!
وكـل ٍ لقـى لـه محـل بجملـة اعـرابـي
والحزن : انا ، لو تعـدّد فيكـم اسمـاءه !!
فتّشـت عنّـي / لقيـت النـاس تحيـا بـي
كُل ٍ – ولكـن – تخلّـت عنّـه اجـزاءه !!
راحوا ( بغاياتي ) .. وخلّوا لي ( اسبابـي )
مثل : الجمل – لا عقروه – وزادوا اعباءه !!
وفتّشتنـي / ومـا لقيـت الآي بثيـابـي !!
وعالم طفولي : هدوءه ( سر ) ضوضاءه !!
الله يسامـح زمانـي ويـش سـوّا بـي ؟؟
ضيّـع قوافـل طموحـي وســط بـيـداءه
كن الجـروح : استجـارت تحـت جلبابـي
وكن العنـاء : كوكـب ٍ واضلاعـي ارجـاءه
وكن السهر : خيمة ٍ واطنابها / اهدابـي !!
وكن القمـر : دمعـة ٍ منّـي وإمضـاءه !!
وكن القصايـد : وطـن تجتاحـه اسرابـي
لا هاجرت من ( بـلاد الخـوف ) لانحـاءه
وكنّي : مدينـة .. سكنهـا شيـخ ٍ اعرابـي
نـوّخ مطايـاه عقـب الشيـب واعـيـاءه
ناس المُدن ( كافره ) ، والشيخ ( وهّابـي )
هَديَه من الشـرع ، وسلومـه مـن ابـاءه
الناس من لحيتـه – تعتبـره – ارهابـي !!
والشيخ ما يامـن الفتنـه علـى ابنـاءه !!
يا عم صعـب اخـذل قلـوبٍ تهقـوى بـي
ووجـيـه مغسـولـة ٍ بالـمـاء ووضّــاءه
أحرقـت باحلـى الأمانـي لاجـل يدفـابـي
شعـب ٍ ريـاح الشتـاء تقـتـات باحـيـاءه
رافعـت باسمـى القضايـا وكانـت اتعابـي
قـلـب ٍ ذكـرنـي بـسـراءه وضــراءه
يكفينـي ان حسّـوا ان غيـابـي ابطـابـي
تزورنـي طيوفـهـم ثكـلـى ومسـتـاءه
ويكفيهم ان جيـت صـارت كذبـة غيابـي
مثل العطـش لا غسلـه الغيـث مـن مـاءه
واللي جهل بـي فـلا يسـأل عـن احبابـي
تبي تعرف الرجـل .. سـل منهـم اعـداءه